Ashtu siç kishte premtuar edhe gjatë fushatës së tij elektorale, lideri demokrat Berisha ka nisur të projektojë ristrukturimin e qeverisë, duke shtuar tri ministri dhe riorganizuar administratën shtetërore.
Qeveri me 14 ministri
Qeveria e PD-së do të ketë në përbërjen saj vetëm 14 ministri. Kjo, si rezultat i deklaratave të Berishës, do të ngulmojë në një staf të vogël, por që do të jetë më produktiv. Gjithashtu, shkurtimi i administratës është një nga premtimet e liderit të Partisë Demokratike e duket se do të gjejë zbatim që me numrin e anëtarëve të kabinetit qeveritar. Një nga qëllimet kryesore të shkurtimit të administratës është kufizimi i shpenzimeve të tepërta, e premtuar kjo nga lideri demokrat gjatë fushatës intensive për zgjedhjet e 3 korrikut. Në ndryshim nga qeveria Nano, e cila kishte në përbërjen e saj plot 18 ministra, kabineti i ri qeveritar paraqitet me rezerva. Më konkretisht, Ministria e Ekonomisë dhe Financave do të shkrihet në një. E duket se njëra prej tyre do të funksionojë si drejtori. Gjithashtu, Ministria e Industrisë dhe e Energjetikës do të jetë e shkrirë në Ministrinë e Ekonomisë dhe Financave, ku do të projektohet edhe ajo si një drejtori brenda kësaj të fundit. Ndërkohë që edhe Ministria e Mjedisit do të shkrihet, nga burime të brendshme të Partisë Demokratike mësohet se ideja për të është që të kalojë në Agjenci Kombëtare e Mjedisit ose në drejtori. Vihet re se Ministria e Rendit Publik do të kthehet në emrin e saj të dikurshëm, në atë të Punëve të Brendshme.
Ndryshimet bazohen te projekti i KOP-it
Berisha ka projektuar dhe reformat institucionale, të cilat i janë prezantuar atij nëpërmjet programit të Komitetit të Orientimit të Politikave. Një reformë e tillë mendohet të jetë rikonceptimi i Ministrisë së Rregullimit të Territorit, decentralizimi i kompetencave të planifikimit në nivelin lokal. Gjithashtu, në qeveri mendohet të zbatohen dhe disa reforma ligjore të prezantuara po nga KOP-i, të cilat kanë të bëjnë me hartimin e një pakete të plotë për planifikimin dhe administrimin e territorit, në përputhje me orientimet e Bashkimit Evropian.

Qeveria e Berishës

• Ministira e Arsimit dhe e Shkencës
• Ministria e Mbrojtjes
• Ministria e Ekonomisë
• Ministria e Punëve të Jashtme
• Ministria e Punëve dhe Çështjeve Sociale
• Ministria e Punëve të Brendshme
• Ministria e Rregullimit të Territorit dhe Turizmit
• Ministria e Bujqësisë dhe Ushqimit
• Ministria e Integrimit Evropian
• Ministria e Transportit dhe Telekomunikacionit
• Ministria e Pushtetit Vendor dhe Decentralizimit
• Ministria e Kulturës, Rinisë dhe Sporteve
• Ministria e Drejtësisë
• Ministria e Shëndetësisë

Qeveria e Nanos

• Ministira e Arsimit dhe e Shkencës
• Ministria e Mbrojtjes
• Ministria e Mjedisit
• Ministria e Financës
• Ministria e Punëve të Jashtme
• Ministria e Punëve dhe Çështjeve Sociale
• Ministria e Rendit Publik
• Ministria e Rregullimit të Territorit dhe Turizmit
• Ministria e Bujqësisë dhe Ushqimit
• Ministria e Integrimit Evropian
• Ministria e Transportit dhe Telekomunikacionit
• Ministria e Ekonomisë
• Ministria e Pushtetit Vendor dhe Decentralizimit
• Ministria e Kulturës, Rinisë dhe Sporteve
• Ministria e Drejtësisë
• Ministria e Shëndetësisë
• Ministria e Industrisë dhe Energjetikës