Të nderuar anëtarë të redaksisë së gazetës "Tirana Observer"!

Në emër të qindra familjeve që banojnë në banesat e ish-pronarëve, që tani pa asnjë mëdyshje mund të quhen shtresa e re e të persekutuarve, ju lutem që të na sensibilizoni me zgjidhjen e problemit tonë jetik. Artikujt tuaj, të botuar herë pas here, ne na kanë ngrohur mjaft, jo sepse na bëni qejfin, por sepse trajtoni me vërtetësi problemin tonë madhor. Ne ndodhemi aktualisht përballë presioneve të vazhdueshme të pronarëve dhe të firmave të ndërtimit që me mënyra të ndryshme kërkojnë të na nxjerrin në rrugë. Ne kemi mbi 50 vjet që jetojmë në këto shtëpi, jemi lindur, rritur, krijuar familje dhe me ligjet e tanishme që janë bërë, apo më keq akoma, që mund të miratohen nga këto presione të ish-pronarëve. Një ditë mund të gjendemi në rrugë me plaçka në krahë, sepse do të na vijë shteti të na nxjerrë jashtë (konkretisht policia, përmbarimi, fadroma) dhe raste të tilla kanë ndodhur.
- Ne nuk kemi bërë as greva, as demonstrata, por kemi kërkuar zbatimin e ligjit nga shteti.
- Ish-pronarëve kur iu konfiskuan shtëpitë, i strehuan në shtëpi tjetër, tani ata i kërkojnë të dy shtëpitë, dhe ne asnjë.
- Kur një pjesë të madhe të popullsisë, banesat e ndërtuara para viteve 1970 u falën, ne, që kemi 50 vjet aty, pse t'i blejmë me dhjetëra miliona 2 apo 3 dhoma, qoftë dhe me kredi "0".
- Një pjesë jemi pensionistë apo në punë shteti, pa asnjë pronë dhe aktivitet, me se do ta lajmë kredinë, qoftë për 20 vjet.
- Pse këto dallime bën shteti për ne, ndërkohë që shoqatat e pronarëve e ngrenë zërin kudo për kthimin apo kompensimin e pronave, për ne që rrimë urtë nuk kujtohet njeri, ndonëse dhe ne me qira të paguara për tërë ato vite mund të kishim përvetësuar, por nuk u la asnjë mundësi privatizimi, përkundrazi aktualisht u persekutuam. Prandaj ne me këtë mënyrë publikimi të problemit tonë ndërmjet medias, ju lutemi që ndërmjet shkrimeve të analistëve tuaj, të pasqyroni dhe një herë gjendjen tonë, stresin tonë të madh kur shikojmë pronarët apo firmat ndërtuese në shtëpi, duke na thënë se kur do ta lirojmë banesën?
Ne nuk kërkojmë përfitime nga kjo, por atë që na takon, kur në të njëjtën kohë kërkohet legalizimi i banesave të atyre që kanë ardhur vitet e fundit në pronat e të tjerëve, ne që kemi respektuar ligjin, dalim të paligjshëm!
Edhe një herë, në emër të drejtësisë të familjeve tona, ju kërkojmë këtë sensibilizim të qeverisë, të Komisionit të Ligjeve, sepse ne do të na vrasë ligji i keq.

Me respekt në emër të qindra familjeve,
Petraq Tasi