Transferime oficerësh në prag të zgjedhjeve
Vetëm një javë nga zgjedhjet parlamentare, Drejtoria e Policisë së Tiranës transferon nga poste të rëndësishme në komisariate, dy shefa dhe 4 oficerë. Ali Allaraj, shef i Komisariatit Nr.3 të Policisë së Tiranës dorëzon këtë post në më pak se një vit në detyrë, për të shkuar në të njëjtin pozicion si shef i Komisariatit të Policisë së Laçit. Në vendin e tij vjen nga një detyrë tjetër në Drejtorinë e Përgjithshme të Policisë, oficeri Nazmi Shuli. Gjithashtu, largohet nga pozicioni i shefit të parandalimit të krimit dhe policimit në komunitet në Komisariatin Nr.1 të Policisë së Tiranës, Edvin Ndreu, i cili transferohet në Komisariatin e Policisë në Dibër. Në të njëjtin komisariat transferohet edhe oficeri i Komisariatit Nr.4 të policisë, Altin Lila, si dhe tre oficerë të tjerë. Në postin e Ndreun vjen ish-oficeri i Seksionit të Dhunës në Familje, Ilir Zhurka.
Itali, kapet me kokainë çifti shqiptar
Policia italiane ka arrestuar dje dy shtetas shqiptarë, një burrë dhe një grua, pasi u kapën me një sasi kokaine të fshehur në makinën e tyre. Lajmin e bëjnë të ditur burime policore nga vendi fqinj, sipas të cilave në pranga kanë përfunduar dy shtetasit me iniciale S.A 32 vjeç dhe C.E 25. Sipas burimeve, ata po udhëtonin me një makinë të tipit “Ford Focus” dhe e kishin fshehur sasinë e lëndës narkotike, rreth 3 kilogramë, në serbatorin e automjetit.
Burimet shtojnë se gjatë kontrollit të makinës agjentët gjetën dhe sekuestruan edhe 2.200 euro, që dyshohet të jenë fryt i pazareve të drogës. Burimet saktësojnë më tej se çështja u ka kaluar agjentëve të Antidrogës për identifikimin e personave të tjerë të përfshirë në këtë trafik kokaine, që dyshohet se ka nisur nga Spanja, duke qenë se edhe makina me të cilën po udhëtonte çifti kishte targa spanjolle.
Dhunohet nga i shoqi, vdes 60-vjeçarja
BERAT- Një grua ndërron jetë në spital pas dhunës së bashkëshortit. Lizheta Mice nga Berati vdiq mëngjesin e djeshëm në Spitalin Ushtarak të Tiranës, pas plagëve të shumta dhe traumave si pasojë e dhunës. 60-vjeçarja kurohej në Spitalin Ushtarak prej disa ditësh, pasi gjendja e saj shëndetësore paraqitej e rëndë. Tashmë mbi bashkëshortin Prokop Mice, në arrest me burg prej 13 qershorit, rëndon akuza për plagosje të rëndë me dashje me pasojë vdekjen. Gjithçka ka nisur pas një grindjeje banale mes çiftit, për një shishe raki, të cilën 60-vjeçarja ia ka fshehur të shoqit që kishte mbërritur në shtëpi i dehur. Prokop Mice pas dhunës së ushtruar e ka mbajtur të mbyllur dy ditë në shtëpi të shoqen. Mungesa e saj ka rënë në sy të fqinjëve dhe të të afërmve, të cilët e kanë shoqëruar në spital. Por me gjithë ndihmën mjekësore, 60-vjeçarja nuk ka mundur të shpëtojë.

"Gerdeci", familjaret e viktimave në Kushtetuese
Familjarët e 21 prej viktimave të tragjedisë së Gërdecit i drejtohen Gjykatës Kushtetuese duke i kërkuar asaj pezullimin e vendimit të Gjykatës së Lartë që i veçon ata nga procesi penal ndaj 30 të pandehurve. Duke e konsideruar vendimin e 22 majit si të papajtueshëm me kushtetutën, thellësisht arbitrar dhe të dëmshëm për jurisprudencën shqiptare katër avokatët e familjarëve të viktimave i kërkojnë Gjykatës Kushtetuese dërgimin për rishqyrtim të kësaj çështjeje në Gjykatën e Lartë, me kolegj tjetër penal. Avokatët kanë radhitur edhe ato që ata i konsiderojnë shkelje në vendimin e kolegjit të kryesuar nga gjyqtari Besnik Imeraj. Sipas tyre Kolegji Penal në atë vendim është kontradiktor me vetveten, pasi nga njëra anë në njërën prej seancave refuzoi të dëgjonte palën e dëmtuar e po ashtu edhe palë paditëse civile, ndërsa në një seance të mëvonshme pa i legjitimuar i veçon nga procesi. Më pas avokatët arsyetojnë se Gjykata e Lartë u shpreh se të dëmtuarit vështirësojnë dhe zvarrisin procesin cilësim ky sipas tyre i kundraligjshëm dhe alogjik. Kjo pasi sipas avokatëve vetë Gjykata e Lartë në caktimin e datave të këtij gjyqi ka shkelur një nga parimet bazë të një procei gjyqësor atë të gjykimit të pandërprerë, duke mos respektuar rregullin përjashtimor të seancave të paktën njëherë në 15 ditë. Avokatët këmbëngulin se të dëmtuarve nuk u intereson të zvarritet procesi pasi ata duan që gjyqësori të shpallë fajtorët dhe me pas ata të dëmshperblehen për të afërmit që humbën në Gërdec, ndërkohë që atyre që u intereson thonë të dëmtuarit e tragjedisë janë vetë të pandehurit që sikurse shtojnë ata dëshirojnë që ky proces të shtyhet dhe të shkojë në kalendat greke.
Rinas, arrestohet një italian, u kap me dokumenta false
Një shtetas italian është arrestuar në aeroportin e Rinasit pasi dyshohet se ka falsifikuar dokumentat e identifikimit. Policia e Tiranës bëri të ditur se gjatë orëve të vona të mbrëmshme, shërbimet e Komisariatit të Policisë Rinas, realizuan kapjen dhe më pas arrestimin në flagrancë të shtetasit Gianfranco Michele Calabretti, 26 vjeç, lindur në Brindisi, Itali dhe banues Bergamo Itali. Policia shqiptare dyshon se Calabretti ka konsumuar veprën penale të falsifikimit të dokumentave. Arrestimi i tij u krye pasi dje në mesditë është kapur në tentativë për t’u larguar për në drejtim të Italisë, ku pas një verifikimi të kryer nga kontrollorët, ka rezultuar se Calabretti ishte i paisur me një kartë identiteti italiane dhe një patentë italiane, ( në emër të një shtetasi tjetër italian), të cilat dyshohet se janë të fallsifikuara.

Nxirret nga liqeni trupi i pajetë i 23 vjeçarit
KRUJE-Nxirret nga ujërat e liqenit trupi i pajetë i 23 vjeçarit i cili u mbyt një ditë më parë në liqenin e Bacungut në rrethin e Krujës. Forcat e Reneas pas shumë orë kërkimesh kanë nxjerrë trupin e pajetë të Flamur Hasanit, rreth orës 13 e 30 të ditës së sotme. 23 vjeçari Hasani, kishte shkuar bashkë me vëllezërit e tij dhe me disa shokë për tu larë në liqen mesditën e së martës, por pas zhytjes në thellësi nuk ka mundur të dalë në sipërfaqe duke gjetur vdekjen.  Të shqetësuar, vëllezerit dhe shokët kanë dhënë alarmin duke njoftuar menjëherë policinë e cila pas mbërritjes në vendgjarje kërkoi dhe ndihmën e polumbarëve nga Tirana, të cilët mesditën e sotme nxorrën nga uji trupin e të riut 23 vjeçar.
Plagosi njw person, vihet nw pranga
Pogradec–Forcat e policisë kanë arrestuar në flagrancë 48-vjeçarin Agim Çekiçi, pasi ndaj tij rëndon akuza e plagosjes së një personi dhe ajo e kundërshtimit të forcave të policisë pas ndërhyrjes së tyre për të shuar konfliktin mes tyre.
Sipas të dhënave policore, arrestimi i tij u bë pasi ai ka goditur me mjetë të forta 17-vjeçarin Gj.G. banues në Pogradec, duke i shkaketuar dëmtime, por për fat gjendet jashtë rrezikut për jetën. Bëhet e ditur se në momentin që kanë shkuar punonjësit e policisë për të kryer detyrën e tyre, ai i ka kundërshtuar dhe fyer në krye të detyrës. Ndaj këtij personi rëndojnë akuzat për veprat penale të “Plagosjes së lehtë me dashje”, “Kundërshtimit të punonjësit të policisë” dhe “Fyerje për shkak të detyrës”parashikuar nga nenet 89,236/2 dhe 239 të Kodit Penal.
RENEA operacion simulues për kapjen e terroristëve
VLORË-Forcat RENEA kanë finalizuar stërvitjen në Vlorë në një operacion te improvizuar, synimi i të cilit ishte lirimi i një prej trageteve nga forca terroriste. Në operacion janë mobilizuar mbi 80 forca nw bashkëpunim me policinë franceze. Të pranishëm në Vlorë kanë qenë Drejtori i Përgjithshëm i Policisë së Shtetit Ahmet Prenci, përfaqësues të Ambasadës Franceze, prefekti i qarkut si dhe drejtues të forcave kufitare. Përfaqësuesit e ambasadës franceze, pjesë e bashkëpunimit në këtë operacion,kanë vlerësuar performimin e forcave shqiptare, duke u shprehur të hapur për bashkëpunime të tjera. Gjatë operacionit forcat RENEA, në një situatë simuluese kanë nxjerrë në pak minuta një grup terrorist, të cilët janë shoqëruar nga mjetet drejt ambienteve të portit.