Koalicioni i majtë opozitar paralajmëron shumë shpejt nisjen e protestave në të gjithë vendin, nëse në një kohë të shkurtër mazhoranca nuk do të bjerë dakord për hetimin e zgjedhjeve të 28 qershorit. Skënder Gjinushi dhe Paskal Milo janë skeptikë për arritjen e një marrëveshjeje, madje në këtë pikë Gjinushi, e shikon si kohë të çuar dëm dhe dy muajt kur PS dhe PD negociuan për zgjidhjen e krizës politike në vend. Kryetari socialdemokrat, Skënder Gjinushi, thotë se kryeministri Berisha ka frikë nga hetimi i zgjedhjeve të shkuara, ndërsa kryetari i Demokracisë Sociale, Paskal Milo, argumenton se demokratët po përdorin qëllimisht strategji e taktika për ta sfumuar transparencën, deri në prag të zgjedhjeve vendore. Milo pohon se opozita nuk do të heqë dorë nga transparenca e votës, dhe për këtë do të përdoren të gjitha mjetet demokratike përfshirë dhe protestat masive në popull. Ndërsa Gjinushi është më radikal, kur thotë se përmes këtyre protestave duhet të kërkohet largimi i qeverisë, për të shkuar paralelisht në maj në mbajtjen e zgjedhjeve vendore dhe atyre parlamentare. Koalicioni opozitar ka institucionalizuar në këtë mënyrë dhe veprimin dhe aksionin politik, që pas takimit të një dite më parë. Aleatet ranë dakord të takohen në mënyrë periodike një herë në javë, për të bashkërenduar jo vetëm aksionin politik, por edhe për të analizuar situatën ekonomike në vend.